“દક્ષિણ આફ્રિકામાં જઈને પરાક્રમનો પરચો આપનારા ભાવનગરના સપૂત હનુભા”

Standard

ધરતીનો ધબકાર – દોલત ભટ્ટ
દક્ષિણ આફ્રિકામાં જઈને પરાક્રમનો પરચો આપનારા ભાવનગરના સપૂત હનુભા
દક્ષિણ આફ્રિકામાં યુદ્ધે ચડેલી અંગ્રેજ સરકારને મદદ કરવા માટે ભાવનગર નરેશ દોઢસો યોદ્ધાઓને હનુભાની આગેવાનીમાં મોકલ્યા હતા
ભરનીંદરમાં પોઢેલી પોયણીને સોણે આવેલ સલુણા સાયબા જેવો સૂરજ ઉગમણા આભને આંગણે આવીને પ્રીતના પાલવડે પરવશ બનેલી પ્રેમઘેલીની ઉજાગરે અંજાયેલી આંખમાં ઘંૂટાયેલી રાતડય જેવો રતુંબડો રંગ રેલાવી રહ્યો છે.
પંખીઓએ માળા છોડયા છે. ગણતરીના ગાળા છુટી ગયા છે એવે ટાણે કંથારીયા ગામમાં વિદાયનાં વાજા વાગી રહ્યાં છે. ઢોલ – ત્રાંસા ધડૂકી રહ્યાં છે. ફુલમાળાને ગજરા મહેંકી રહ્યા છે. કંકાવટીએ કેસર ધોળીને હનુભાને તિલક થઇ રહ્યાં છે. દેવકન્યા જેવી ગામની દીકરીઓ હનુભાને વિજય વરીને વહેલા પાછા વળવા વેણ વદી રહી છે. છોકરા – છાબરા સહિત આખું વાગડ કંથારીઆ ગામના પાદરમાં પગ ખોડીને ઉભું છે. ને રાંગમાં ઘોડો રમાડતા ચુડાસમા નુખના હનુભાના અંગ માથે મૂછોના કાતરા ઓતરદખ્ખણ વાયરે ફગફગી રહ્યા છે. ખભામાં બે જોટાળી જંજાલ્ય ઝૂલી રહી છે. લોખંડી લખતર છાતીને ભીડીને પડયું છે.
લશ્કરી લિબાસમાં કરડાને કદાવર લાગતા રાજપૂતે ગામની વિદાય લઇને ઘોડાને એડી મારી ત્યારે ‘વહેલા પાછા વળજો..વહેલા પાછા વળજો’ના સાદ જાણે ગામના સીમાડા સુધી સગડ દબાવતા સંભાળતા રહ્યાં.
વાત એમ હતી કે અંગ્રેજ સરકાર દક્ષિણ આફ્રિકામાં યુદ્ધે ચડી હતી. હિન્દના સરસેનાપતિ ફીલ્ડ માર્શલ અર્લ કિચનર પંડયે ટ્રાન્સવાલના મોરચે મરદાનગીનો માંડવો નાંખીને પડયો હતો. દેશનાં દેશી રજવાડાંઓ કિચનની ભેર કરી રહ્યા હતા. ત્યારે ેભાવનગરના ભૂપાળ ભાવસિંહજીનો હનુભા ઉપર હુકમ છુટયો કે કિચનરની ભેર કરવા ટ્રાન્સવાલ પૂગો. ઠાકોર ભાવસિંહજીના હુકમને માથે ચડાવીને ચુડાસમો રાજપૂત દોઢસો ઘોેડેસ્વાર ભાવનગરને બંદરેથી વહાણમાં ચઢાવીને ટ્રાન્સવાલની ધરતી માથે પગ મૂકવા પાણી ખાંપવા લાગ્યો.

આફ્રિકાની ધરતી પર અગનજવાળાઓ ભભૂકી ઉઠી. અઢળક સોનું પકવતી ભોમકાના ચારેય સીમાડા સળગી ઉઠયાં છે.
રણસંગ્રામનાં રણશિંગા ફુંકાઇ રહ્યાં છે. અંગ્રેજોનું દળકટક દુશ્મનોનો દાળોવાટો કાઢતું આગળ ધપી રહ્યું છે. વાગડ કંથારીઆનો હનુભા હૈયામાં હામ ભરીને લોર્ડ કિચનરનું પગલે પગલું દબાવતો દુશ્મનોને ડોળા દેખાડતો મર્દાનગીની જડાસ મશાલનાં અજવાળાં પાથરતો પડયો જાય છે. બંદૂકોની બઘડાટી બોલી રહી છે.
પરાજય પામતા શત્રુઓ શૂરવીરતાની આખરી જયોતને જલતી રાખવા મેદાને જંગ ખેલી રહ્યા છે. સેનાપતિ લોર્ડ અર્લ કિચનર આગવને આગળ કૂચ કરી રહ્યો છે. ભાવનગરના દોઢસો ઘોડા ટ્રાન્સવાલની ધરતી માથે ડાબા દઇ રહ્યાં છે. ચકોર ચુડાસમાની આંખ ચારે દિશાને માપી રહી છે. જેની માથે હિન્દના હાકેમના રખવાળાની જુમ્મેદારી છે તે કિચનરનો વાળ પણ વાંકો ન થાય એ માટે હનુભા શત્રુના સાણસાવ્યૂહને ઉકેલતો કિચનરનું પડખું દબાવીને મોરચાની મોવડયમાં રણસંગ્રામ ખેલી રહ્યો છે.
ટ્રાન્સવાલના આભની અટારીથી અરૃણ અજવાળું સંકેલતો સંધ્યાના આથમણે ઓરડે ઉતરી રહ્યો છે. લોહીભીની ધરતી સૂર્યના છેલ્લા કિરણો ઝીલતી કળેળી ઉઠી છે. લાશોના ખડકલા વચ્ચે કણસતા સૈનિકોની છેલ્લી ચીસો ઉઠી રહી છે. કલેજા કંપાવતી કિકિયારીઓ ધડીમ..ધડીમ છુટતાં બંદૂકોના અવાજમાં ઓગળી રહી છે. ત્યાં તો કિચનરના મોતનું નિશાન નોંધીને દુશ્મનની બંદૂકમાંથી ગોળી છૂટી. ચૂડાસમાને કિચનરનો ખાતમો કરાવવા આવતી ગોળીને પંડયના બખતર ઉપર ઝીલીને લોર્ડ કિચનરનો જાન બચાવી લીધો. એ જોઇને લોર્ડ કિચનર હનુભાને બાથમાં લઇને ભાવથી ભેટી પડયો. ત્યાં કિચનરની આંખમાં આભારના ભાવ અંજાઇ ગયા હતા. ભાવનગર રાજ્યને વિશ્વમાં વિખ્યાત કરનાર જવામર્દ હનુભા રણછોડ ચુડાસમાને દરબાર ભરી તલવાર અને જાગીર ભેટ આપી બહાદુરીની કદર કરી હતી. અંગ્રેજ સરકારે ભાવનગરના રાજ્યનાં બે મોઢે વખાણ કર્યા હતા અને ધન્યવાદ આપ્યા હતાં.

આ બનાવ ઇ.સ.૧૯૦૫માં બન્યો હતો. પહેલા વિશ્વયુદ્ધ વખતે હિન્દના સેનાપતિ લોર્ડ કિચનરને ઇગ્લેન્ડનાં વિગ્રહપ્રધાન બનાવવામાં આવ્યા હતાં.
તણખો :

વર્તમાનમાં એવી વિચારધારા વહેતી કરનારા છે કે જેઓ શાસ્ત્રો – પુરાવો  – કર્મકાન્ડને નિરર્થક પુરવાર કરવા મથે છે. જયોતિષ શાસ્ત્રના પારંગત ન હોય એવા લોકો અજમાયશ કરે અને નિષ્ફળ જાય તેથી જયોતિષ શાસ્ત્ર પાખંડ છે એવું પુરવાર ન થાય. જેમ કે જે તબીબ પાસે રોગનું નિદાન કરવાની સમજણ ન હોય ને દર્દીને સાજો ન કરી શકે તેથી તબીબી વિજ્ઞાાન નિષ્ફળ કે ખોટું છે એમ કહી શકાય નહીં.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s